Tartanka Duqa Minneapolis
Jacob Frey ayaa wajahaya loollan adag oo kaga imaanaya Cumar Faatax, tartankan oo ah mid muujinaya aragtiyo kala duwan oo ku saabsan sida loo maamulo magaalo xor ah oo la tacaalaysa caqabado is biirsaday — dambiyada, guryaha la’aanta, iyo xiriirka bulshada iyo booliiska.
Frey, oo doonaya in markiisii saddexaad loo doorto xilka duqa, ayaa markan wajahay musharrax Soomaali ah oo leh taageero ballaaran iyo fariin isbeddel oo si qoto dheer uga hadlaysa sinaanta bulshada iyo caddaaladda dhaqaale.
Cumar Faatax Oo Ku Soo Baxay Awoodda Soomaalida iyo Dimuqraadiyiinta
Xisbiga Dimuquraadiga ee Mareykanka, laantiisa gobolka Minnesota, ayaa hore u taageeray ololaha Cumar Faatax ee duqa magaalada. Tani waxay ahayd tallaabo muhiim ah oo muujisay kalsoonida xisbiga ee hoggaankiisa cusub.
Faatax ayaa qoraal uu ku daabacay bartiisa X (Twitter) ku sheegay:
“Waxay sharaf ii tahay in aan noqdo musharraxa rasmiga ah ee Xisbiga Dimuquraadiga u matalaya duqa Minneapolis. Waxaan u taaganahay caddaalad, cadaalad bulsho iyo horumar loo siman yahay.”
Xaaladda Minneapolis Iyo Caqabadaha Jira
Gobolka Minnesota ayaa ah mid ay Soomaalidu si weyn uga muuqato, iyadoo boqolaal Soomaali ah ay xilal kala duwan ka hayaan dowladda deegaanka iyo ururrada bulshada. Hase yeeshee, magaalada Minneapolis wali waxay wajahaysaa dhibaatooyin la xiriira booliiska iyo kala duwanaanshaha dhaqaalaha.
Frey ayaa si weyn loo dhaliilay kadib dilkii George Floyd ee 2020, balse maamulka uu hoggaamiyo ayaa tan iyo markaas ku guuleystay in uu heshiisyo dib u dhis ah la galo dowladda dhexe si loo hagaajiyo waaxda booliiska magaalada.
Waa Kuma Cumar Faatax?
Cumar Faatax, oo 35 jir ah, waa siyaasiga ugu cadcad ee Soomaalida Mareykanka waqtigan. Wuxuu ku dhashay Washington, D.C, waana wiil ay dhaleen waalidiin Soomaaliyeed oo qaxooti ahaan u tagay Mareykanka. Faatax wuxuu shahaadada Maamulka Dadweynaha ka qaatay Jaamacadda George Mason.
Wuxuu hore uga soo shaqeeyay mashaariicda bulshada Minneapolis, isagoo ahaa isku-duwaha Waaxda Gaadiidka ee gobolka iyo falanqeeye ganacsi oo ka tirsan Jaamacadda Minnesota. Markii loo doortay Senator-ka gobolka Minnesota sanadkii 2020, wuxuu noqday Muslimkii iyo Soomaali Mareykankii ugu horreeyay ee ku biira Senate-ka gobolkaas.
Qorshihiisa Siyaasadeed
- Kordhinta mushaharka ugu yar ee magaalada ilaa $20 doolar sanadka 2028.
- La dagaallanka rabshadaha booliiska iyo hubinta in booliisku ay u shaqeeyaan si caddaalad ah.
- Kordhinta sahayda guryaha la awoodi karo ee dadka danyarta ah.
- Inaan booliiska magaalada la oggolaan inay la shaqeeyaan hay’adaha socdaalka sida ICE.
- Ilaalinta xuquuqda darawallada Uber iyo Lyft ee magaalada.
Isaga oo ka hadlayay ololihiisa, Cumar Faatax ayaa yiri:
“Minneapolis waxay u baahan tahay hoggaan cusub oo daacad ah, mid si dhab ah u fahmaya bulshada, uguna adeegaya danta guud ee dadka — aniga iyo bulshada Soomaaliyeed waxaan halkan u joognaa inaan isbeddelkaas horseedno.”
Saadaasha Tartanka
Inkasta oo 13 musharrax ay ku jiraan liiska doorashada, warbixinaha horudhaca ah ayaa muujinaya in Cumar Faatax iyo Jacob Frey ay yihiin labada musharrax ee ugu cadcad. Saadaalihii ugu dambeeyay ayaa tilmaamaya in tartanku aad u dhow yahay, iyadoo bulshada Soomaalida, Muslimiinta, iyo dhalinyarada uu taageero xoog leh ka helayo Cumar.
