Xukuumadda Somaliland ayaa markii ugu horreysay shaaca ka qaaday in ay socdaan wadahadalo iyo dedaalo lagu doonayo in lagu siidaayo ciidamada maamulkaasi ku xiran Magaalada Laascaanood ee xarunta Waqooyi Bari Soomaaliya.
Wasiirka Gaashaan-dhigga oo Faahfaahiyey
Wasiirka wasaaradda gaashaan-dhigga Somaliland, Maxamed Yuusuf Cali (Ilka-case), ayaa sheegay in dedaal walba lagu bixinayo sidii ciidamadaasi loo sii dayn lahaa. Wuxuu tilmaamay in hadda ay jiraan waddooyin furan oo lagu fulin karo siidaynta maxaabiista, isla markaana uu socda process-ka wada-hadalka isagoo aan carrabaabin cidda garwadeenka ka ah.
“Maxaabiista process ayaa socda, dowladdu waxay diyaar u tahay waddo kasta oo maxaabiistaa lagu siidaynayo waddooyin badana hadda waa furan yihiin oo aanan ka hordhacayn,” ayuu yiri wasiir Ilka-case.
Saameynta Madaxweynaha Somalia
Madaxweynaha Soomaaliya, Xasan Sheekh Maxamuud, ayaa booqashadiisa Laascaanood shuruud ka dhigay in maamulka Waqooyi Bari sii daayo maxaabiista reer Somaliland. Tani waxay sababtay in Madaxweyne Firdhiye uu magacaabo guddi wada-xaajood oo ka shaqeeya arrintan.
