Cammaanka ee maamulka Galmudug, gaar ahaan Booliska degmada Guriceel, ayaa sheegay inay gacanta kusoo dhigeen nin lagu eedeeyay inuu
xalay dil bareer ah ugu geystay magaalada Guriceel ganacsade si weyn looga yaqiinay deegaanka.
Ganacsadaha la dilay ayaa lagu magacaabi jiray Deeq Cabdi Jaamac, waxaana la sheegay inuu ka mid ahaa dhalinyarada ganacsatada ah ee bulshada dhexdeeda aad looga yaqaanay, gaar ahaan degmada Guriceel ee gobolka Galgaduud.
Booliiska Guriceel ayaa warbaahinta u soo bandhigay eedeysanaha oo lagu magacaabo
Cabdifitaax Cali Xasan Diiriye, iyagoo sheegay inuu ku lug lahaa falka dilka ah ee loo geystay ganacsadaha.
Taliska Booliiska degmada Guriceel ayaa sheegay in eedeysanaha si degdeg ah loo horgeyn doono cadaaladda, taasoo muujinaysa sida ay laamaha ammaanka
uga go’an tahay sugidda nabadgelyada iyo ka hortagga dambiyada ka dhaca degmada.
Mas’uuliyiin ay ka mid yihiin Guddoomiye ku-xigeenka degmada Guriceel Shaafici Jaamac Cabdi, Taliyaha Booliiska Saldhigga iyo saraakiil kale ayaa digniin
adag u diray dadka ku hawlan falalka la xiriira aas-aaska aanooyinka qabiilka iyo dilalka qorsheysan.
Allah u naxariistee Deeq Cabdi Jaamac ayaa noqday qofkii ugu dambeeyay ee lagu dilo gobolka, iyadoo dilalku ay weli yihiin kuwo si joogto ah uga dhaca
deegaanno ka tirsan Galgaduud iyo Mudug, gaar ahaan dhulka hoos taga maamulka Galmudug.
Xog dheeri ah
- Eedeysanaha ayaa lagu qabtay muddo kooban kadib falka dilka
- Booliiska waxay sheegeen in baaritaanno dheeri ah socdaan
- Dadka ku howlan falalka lidka ku ah amniga ayaa loo digay
