Ra’iisul Wasaaraha Xukuumadda Federaalka Soomaaliya, Xamse Cabdi Barre, ayaa maanta kulan gaar ah kula yeeshay Xafiiskiisa magaalada Muqdisho Safiirka Dowladda Jarmalka u fadhiya Soomaaliya, Sebastian Groth.
Iskaashi Dhaqaale oo Cusub
Inta lagu guda jiray kulanka, labada mas’uul ayaa ka wada hadlay sidii loo dardargelin lahaa maalgashiga Jarmalka ee Soomaaliya, loona abuuri lahaa fursado ganacsi oo dhiirrigeliya horumarka iyo shaqo abuurka.
Ra’iisul Wasaare Xamse Cabdi Barre ayaa uga mahadceliyey dowladda Jarmalka taageerada joogtada ah ee ay siiso dowladda federaalka iyo shacabka Soomaaliyeed. Wuxuu xusay in iskaashigaas uu muhiim u yahay kobcinta dhaqaalaha, xasilinta amniga, iyo dhisidda kaabayaasha dhaqaalaha.
“Jarmalka waa saaxiib istiraatiiji ah oo Soomaaliya la garab taagnaa mar walba. Heshiiskan cusub wuxuu ka tarjumayaa kalsooni iyo wada shaqayn dhab ah oo u dhaxaysa labada dal,” ayuu yiri Ra’iisul Wasaare Xamse.
Jarmalka oo Ballanqaaday Taageero Cusub
Dhankiisa, Safiirka Jarmalka ee Soomaaliya, Sebastian Groth, ayaa sheegay in labada dal ay ka dhaxeyso saaxiibtinimo qoto dheer, wuxuuna ballanqaaday in dalkiisa uu sii wadi doono taageerada dhanka maalgashiga, amniga, iyo dib-u-dhiska dhaqaalaha Soomaaliya.
Safiirka ayaa sidoo kale hoosta ka xarriiqay in heshiiskan uu furi doono waddooyin cusub oo lagu xoojinayo iskaashiga labada dowladood, si gaar ahna u taageeraya yoolalka horumarinta waara ee Soomaaliya.
Ugu dambeyn, kulanka ayaa lagu soo gebagebeeyay is-afgarad ku saabsan in labada dhinac ay si joogto ah u sii wadaan wada-hadallada lagu xoojinayo xiriirka diblomaasiyadeed, dhaqaalaha, iyo danaha guud ee labada dal.
