Madaxweynaha Tanzania, Samia Suluhu Hassan ayaa guul weyn ka gaadhay doorashadii dalkaasi, iyadoo heshay ku dhawaad 98% codadka, sida ay subaxnimadii maanta oo Sabti ah ku dhawaaqeen guddiga doorashooyinka.
“Waxaan halkan kaga dhawaaqayaa in Samia Suluhu Hassan loo doortay Madaxweynaha Tanzania iyada oo ka socota xisbiga CCM,” ayuu yiri Guddoomiyaha Guddiga Doorashooyinka, Jacobs Mwambegele, isagoo ka hadlaya telefishinka qaranka.
Guddoomiyaha INEC ayaa sheegay in Samia ay ku guuleysatay 31,913,866 cod oo ka mid ah 32,678,844 cod oo la dhiibtay, taasoo siinaysa awood buuxda muddo shan sano ah.
Waa Tuma Samia?
Samia Suluhu Hassan, 65 jir, waxay ahayd Madaxweyne Ku-xigeenka Tanzania tan iyo 2015, ka hor inta uusan dhiman madaxweynihii dalkaas, John Pombe Magufuli, sannadkii 2021. Waxay noqotay haweeneydii ugu horreysay ee qabata xilka ugu sarreeya ee Tanzania, sidoo kale waxay tahay madaxweynihii labaad ee ka soo jeeda Zanzibar.
Madaxweynihii ka soo jeeday Zanzibar ee xilka kaga horreeyay wuxuu ahaa Cali Xasan Mwinyi, oo dalka hoggaaminayay 1985-1995.
Taariikh Nololeed iyo Ololihii Doorashada
Sannadkii 2015, Samia waxay ka soo muuqatay ololihii doorashada iyadoo hor-keentay xisbiga CCM, iyadoo magaceeda la siiyey “Hooyo” ama “Mama” si ay u muujiso xiriir dadka ah. Taasi waxay ka dhigtay mid dad badan soo jiitay oo lagu xusuusto magaca Samia Suluhu Hassan.
Markii uu geeriyooday Magufuli, Samia waxay si rasmi ah xilka u qabatay, iyada oo horey uga soo shaqeysay xafiisyo kala duwan oo dowladda ah muddo 15 sano ah, oo ay ku jiraan:
- Madaxa Barnaamijyada Hay’adda Cuntada Adduunka (WFP) ee Zanzibar (1998-1999)
- Sarkaal dhanka qorsheynta qaabilsan (1987-1988)
- Waxbarashada Maamulka iyo Maareynta oo ka baratay Jaamacadda Manchester (UK) iyo Mzumbe (Tanzania)
Nolosha Qoyska
Samia waxay guursatay Hafidh Amiir sanadkii 1978, waxayna leeyihiin afar caruur ah. Wiilkeeda ugu caansan, Wanu, waa xubin ka tirsan baarlamaanka Tanzania.
